Les Echos Athois

Guy préd congeu

Un mardi d’ fin d’aoutte, eul vé s'a dèkin-neu,

il a souffleu si fort qui nos a épouvanteu

li n'sétoit pu ses forches , i s’a  lèyeu dalleu

é péssant à nousautes on n'peut nieu s'oublieu

Un mardi d’ fin d’aoutte, eul vé s'a égouffreu,

dé no belle petite ville, et nos a égèleu

 a souffleu dé nos'coeurs et nos a destermineu

mînme si on l'attèdoit, c'eut dur de l'accepteu.

Guy' préd congeu, euss'co chi , i s'é va !

Trop fatigueu , d' tous ses tracas !

On l'vérra co, surmé, su les terrasses

au mois d'aoutte, avec Gouyasse!

C'cop chi, j'vos'l'dis, Guy préd congeu !

Un mardi d’ fin d’aoutte i nos a coupeu  l'fil.

I n’avoit pu d' courage, tout pierdu dé l'dallache

Eule biette dalloit trop vite,  eul crabe li mingeoit ses limites,

quand l’ennemi eut trop  trop fort, on n’sait pu fé d’efforts.

Un soir de fin d’aoutte, on a sétu  l'solitude,

quau volée , é trente ans, on préd des habitudes

al vire su les estrades,  pourmenant au faubourg

pou ête maieur  à  Ath, falloit  branmée d'amour.

Guy' préd congeu, euss'co chi , i s'é va !

Trop fatigueu , d' tous ses tracas !

On l'vérra co, surmé, su les terrasses,

au mois d'aoutte, avec Gouyasse!

C'cop chi, j'vos'l'dis, Guy ,préd congeu !

Un mardi d’ fin d’aoutte j'ai sétu l'vé tourneu

un vé si froid d'aoutte  que j' n' imaginois  nieu

qui saroit tant souffrances, qui saroit tant douleurs

ca n's'oublie nieu si vite, 20 ducasses de bonheur

 Un mardi d’ fin d’aoutte j'ai compris qu'c'ètoit tout'

eul partie eut finie, eul livrée eut trop courte

l'horloch s'a arrêteu  on va kangeu les z'heures

il ara met’nant l’temps d’attènne eul' retour du coeur.

Lariguette, le 23 août 2012